無聊有序

點解你明明唔識中文，偏偏係要同我講中文？

點解已經次次ban你，你仲要一次又一次再黎？

點解你d橋咁屎，你都覺得好醒？

點解你把聲咁嘈，你仲咁多野講？

點解你個人咁煩，你都唔知你煩？

只可以恭喜你，越白癡越快樂。

落大雨，問老豆做乜唔著短褲，三個骨都好，唔使濕晒。答案係：「無！」原因：「肉鬼酸......腳幼。」!!!!!!!果然愛美係人既天性，不過可以咁老實，就需要更多......天真？

未上畫就約貴人事忙既「靚女」睇《赤壁》捧最愛既朝偉同武哥哥場，承蒙「靚女」今晚錯愛撥冗兼買埋飛，終於睇到喇！

 

我覺得好睇喎。一黎出字幕已經十足占士邦片咁架勢，不過影黎影去得把劍好似有d hea~嘻。節奏慢得黎場面夠氣勢，直頭有荷里活大片格局，十足魔戒加鬼盜船，音樂都似埋！

 

幾個主角出場好型，當然尤其我的武哥哥&朝偉！！！朝偉今舖返晒黎，收起黃大導或張大導麾下既電眼，幕幕有戲，就算三秒大頭shot都無難度。武哥哥就難搞d，《投名狀》拍住劉華佢招kawaii都仲使得下，呢舖拍朝偉加成班好戲之人，佢都淨係識擺得戚樣同定格，眼珠都唔轉下，拍得住我以前岩岩上枱讀個陣咁「專心」~莫非要為「既生瑜，何生亮」大平反？不過，都仍然kawaii既！尤其行起黎個下真係風度翩翩，暈得我，哈哈哈！另外胡軍同曹操（唔知演員邊位，sorry）keep住超型！張震、趙薇都ok！中村獅童係咪專登搞笑？chiling......唔好提......可唔可以搵人配走佢把台灣口音聲，同埋對鳳爪手......

 

論場面，得呀，打得超正！武指好掂！(唔知出自邊個手筆，好似換過班。)不過始終都係逃唔過吳大導最愛既慢鏡式，古裝無得玩雙槍佢就玩雙「槍」。八卦陣一幕又係個個武官逐個上陣，稍嫌有d翻炒出場個氣勢，張力略減。同埋d二打六可唔可以交下戲？成日陰陰嘴呆唔呆笑唔笑想點？呢下真係唔夠d鬼佬戲。

 

對白就......可以唔咁爛gag羅。雖然其實幾個老戲骨都有番d火候，搞笑得黎留有餘地，但唔係個個handle到......唔開名喇......費事又話武哥哥。劇情同造型姑且不評，因為根本未睇過三國，哈。不過美指係認真的。

 

至於音樂，細路吹笛(定蕭？)首歌好好聽。不過朝偉同武哥哥鬥琴個下有d離譜，中樂唔係咁玩架？仲要眉來眼去，以為睇緊古裝版春光乍洩......尾場朝偉點火本黎好型，但係突然揀隻老土fonts出字，即刻娘左十年......

 

總的而言，都係個句，好睇！早幾日睇左《mummy 3》，覺得唯一可取之處就係可以將中國古代用荷里活大場面包裝出黎。而家吳大導都可以自家製，荷里活拜拜！

 

嘩好耐未試過寫咁多野，事關今日正能量超晒標！雖然一早仲好唔開心，因為阿姐俾落d麻煩野我搞，但係我好positive咁即刻組織大家lunch飲茶輕鬆下，仲訂埋枱。然後好認真咁做到就做，做唔到就報告，阿姐又好reasonable咁正面回應，總算搞掂半壇。而且單野無聊得黎對於我呢個外行人都算有野學。

 

放工「靚女」走唔到，我都夜左收，但係仍然超好心情自己去攞con，整埋眼鏡，仲趕頭趕命買埋最愛既武大郎燒餅俾「靚女」一齊邊睇邊食，「靚女」又買番爆谷俾我，so sweet！哈哈。

 

睇完戲落雨無帶遮，一樣無發老脾，去七仔買把cheap cheap地，返屋企途中見到隔離大嬸，不嬲都無兩句，我失驚無神甜笑彈句「好大雨呀」(其實我都唔知點解我會咁~呵)，嚇到佢咀都O埋，即刻把聲高八度好嬌俏咁答番我「係呀~」！so funny！返到去我又抹埋對濕晒既花花鞋，真係無幾可，明明平時都係佢要死唔通唔俾佢死個隻。今日，真係好開心呀！哈哈哈！

無原因，無理由。可能聽得囍帖街、與我常在同葡萄成熟時太多。又可能訓得太多。又可能訓唔夠。

 

不過原來無乜愁既愁好易醫。只要斟杯酒。開心晒。

 

錢可以解決既問題唔係問題。酒可以解既愁唔係愁。

 

仲有陪我傾偈既朋友仔，仲有講笑話我聽既朋友仔，夫復何求？

wkend煲左兩套戲，《notes on a scandal》同《thank you for smoking》。前者衝住judi dench而睇，好鍾意佢，不過唔知係為配合角色定真係遮唔住，佢塊面d縐紋多到我憑着愛都唔係好頂得住。另加送cate blanchett。講基既老姑婆教師睇中新黎女教師，點知發現新黎女教師同未成年學生搞埋一齊，於是乘機親近、威迫、利誘等等。仲有新黎女教師同阿伯老公一家既副線。基本上係一部道德淪亡既戲，完全反映現實世界人性一面。《thank you for smoking》似小本製作，但小本中手法又幾搞笑。講lobbying。

 

早前又睇左batman同《hancock》。覺得小丑太人性，太有邏輯，真係想問番佢why so serious？《hancock》反而有驚喜，好中意同生同死個概念，very romantic呀！哈哈！